البوست اللى فات كنت قولت انى ودعت الحزن فى البوست دة بقى هقول ليه..........
************* ************** ************
مرة من المرات اللى ببقى تايهة فيها................
فى يوم من الايام اللى بكون مخنوقه فيها..............
فى ساعه من السعات اللى دمعتى بتبقى محبوسه جوايا فيها..........
سمعت صوت , اتخضيت دورت على مصدر الصوت قولت :ن؟....انتى فمين؟...انتى ميين؟...
قالت: انا هنا....جواكى ....شوفينى ...هتلاقينى ...انا انتى انا نفسك
قولت: نفسى ...وعايزة منى ايه دلوقتى سبينى فى حالى
قالت: اسبك...انتى انا لو سبتك هضيعى وضيعينى معاكى
قولت :وعايزة ايه منى دلوقتى؟
قالت: عايزة اعرف مالك مش انتى الانسان الجميل اللى كنت جواه ......فين الضحكة اللى كانت بتسمع الدنيا.؟..........فين الشقاوةاللى بتفرح الدنيا؟...دة كله راح فين؟
سكت وسرحت فى الكلام مش عارفة ارد
قالت: ايه سكتى ليه؟!هترجعى تسكتى وتسبينى تانى؟!فهمينى مالك؟!
قولت: بدور على اجابات لأسئلتك اللى حيرتنى وحيرتك ......مش عارفة,الضحكة تاهت ,والشقاوة ماتت .....مش عارفة ليه؟؟!!الحزن عرف طريقى منين ؟وليه مش عايز يسبنى ........ليه؟
قالت:انتى .....انتى اللى مش عايزة تسيبى الحزن مش هو
قولت: ازاى؟!!......انا!
قالت: انتى اللى قتلتى شقاوتك وضيعتى ضحكتك ........تقدرى تقولى انتى ليه حزينة
قولت: حزينة!!!.....مش عارفة........ممكن علشان........تفتكرى فى حاجه فى الدنيا دى تفرح من اصغر لاكبر حاجه فيها .....
قالت: صلحى نفسك الاول متعيبيش على الدنيا وانتى جزء منها يعنى اللى فيها فيكى .....فكرى صح بوصيلها من ناحية تانية ...ليه دايما انتى واللى زيك شايفينها سودة اكيد فيها الابيض ......بصى كويس
قولت: ابص!!......ناحية بيضة!!....بس الوحش دة الناحية السودة هنعمل فيها ايه؟!؟!!!
قالت: مش قولت لك ابدئى بنفسك الاول ........انتى مرة قولتيلى انك نفسك تبقى حاجة
قولت: اه ......نفسى
قالت: خلاص ابدئى من هنا بس ابدئى صح
قولت: ازاى؟
قالت: اولا- انسى الحزن ولا اقولك اقتليه خالص
ثانيا- اتقى الله فى دينك ودنياك واهلك
ثالثا-حددى هدفك صح وركزى للوصول اليه
رابعا بقى ودى الاهم اضحكى دة انتى اسمك بسمة يا شيخة
قولت: هههههههههههه (وش مبتسم)
قالت : ايوة كدة وانتى انشاء الله..........ايه رايحه فين ؟
قولت وانا مقتنعة بالكلام : هروح ابدء صح علشان اعيش صح........والحق نفسى والحقك
************** ************ *************
دة كان حواربينى وبينى
نفسى كلنا نخلع النظارة السودة اللى على عنينا دى علشان نشوف الدنيا بيضة .......ليه لاء يعنى ...فيها ايهيعنى
جربوا معايا مش ممكن فعلا تكون الدنيا بيضا واحنا مش شايفين
انا رغاية صح .........كفايه كدة وسلام عليكو
.jpg)
.jfif)
.jpg)
51 التعليقات:
رغايه اه
بس نفسك كمان رغايه
المهم انا اتلغبطت انتى مين فيهم
هههههههههههههه
عزيزتى بسمه
بجد حوار رائع و جميل
يارب يبعد عنك الأحزان و يسعدك
انتى طبعا عندك حق لازم كلنا نبدأبنفسنا و نغير فيها
تحياتى
صوت من مصر
انا عارفه انى رغاية انا قولتلك حاجه
هههههههههه
المهم انا بسمة
zainab
يارب ياحبيبتى انا وانتى واللى زى كلهم
تحياتى
ونورتى
احنا اللى بايدينا نخلى الدنيا حلوة و بايدينا نخليها متتعش ابدا
الواحد بايده يفرح و بايده بردو يموت نفسه فى الحزن
" معظم الناس سعداء بقدر مايجعلون عقولهم عليه "
نفسك صح على فكرة .. ولو كل واحد بدأ بنفسه حاجات كتييير هتتغير
ربنا يبعد عنك اى حزن و دايما البسمه منورة وشك يابسمه انتى (:
مش اول زيارة نيهاهاهاهاهاهاهاها
بسمة اخيرا رجعتي تاني
اولا انتي طلعتي اللي جواكي صح باسلوب حلو ومنظم
ثانيا سردك حلو للرواية
ثالثا زكري يابت كويس ومش عايزين دلع
خلاص .
رابعا يسلم قلبك.
بوست رائع وجميل جدا وتسلم ايدك
معاكى حق لابد ان نبدء با نفسنا
تحياتى ليكى وتقبلى مرورى
شخابيط mahgoub
Sweet Violet
ايه دة انتى طلعتى هنا كمان
ومش اول زيارة كمان
هههههههههووووووووووووز
eyad
والله مركزة ......وبعدين فيها ايه لما اريح شوية
ادعولى بس باقى 85 يوم فقط
ويسلم كيبوردك اللى كتب التعليق
شخابيط محجوب
اهلا بيك فى زيارتك الاولى
وانشاء الله ليست الاخيرة
حوار بالفعل رائع
ادعو الله لك ان يبعد عنك كل حزن
فلسطينى حر
تشرفت بزيارتك فعلا
اتمنى الا تكون الاخيرة
بسمة
خليكى دائما بسمة
يقال أن كل منا فيه شئ من اسمه
وأنت فعلا بسمة تدعو دائما للتفاؤل أحييك على ذلك .
لا يوجد شئ بهذه الدنيا يستحق الحزن فلنحول كل شئ لإسعادنا
تحياتى
شيمو القمر
وهو ده الكلام صح الصح
حلوة اوى الحوارات دى
يا رب تبقي دايما اسم على مسمى يا بسمة
تحياتى ليكى
اعترافات قلب
بما انه لايوجد مايستحق الحزن ,اذا فلا للحزن
وبما انك نورتينى فانا سعيده
بنوتة
ادعيلى بس ولكيش دعوة باللى هيحصل
نورتينى ياسكر
ياحبيبتي مش رغاية ولا حاجة
عامله زيي فمش هقول طبعا رغايه
هههههههههههههههههههه
جميييييييييييييلة يخرب بيت شياطينط
عجبتني أوي طريقتك
لازم كلنا نخلع النظارة السودا دي
ونبدأ من جديد
بعثتي فيا الأمل
يابسومة
والله انا بردو كنت كئيبه ومازلت لحد ما قرات البوست
لأ واللي دحكني(دا انتي اسمك بسمة ياشيخه)
ههههههه
ربنا يسعدنا انا وانتي ويسعد باقي المدونين
سلام يابسووومة
يابنتي اكتبيلي ايميلك مش نافع من البروفايل بسرعه
مستنياكي
هو اهو يا ستى
memo_love_me24@yahoo
ههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههه
تحفه والله
دوشتك معلش مأضفتكيش
اصل انا قفلت النت ولسا فتحاه
هضيفك حاضر
ماشى ياست بسمه
يلة مستنياكى
بس بسرعه ربنا يكرمك دوختينى
ههههههههههههه
احلا حاجه في الدنيا ان الانسان يتكلم مع نفسه ويصالحها ويحاسبها علي فكره الناس المتزنه نفسيا لو تحاورتي معاهم هتلاقي انهم بيعملوا كده
وهي دي النفس اللي ربنا اتكلم عنها النفس اللوامه اللي كل شويه تحط صاحبها علي الطريق الصحيح
والله واعلم
شمس النهار
اهلا بيك
وحقيقى اسعدنى كلامك جدا
يارب تكررى الزيارة
السلام عليكم ورحمة الله وبركاته...وبعد
فبرجاء التنبيه... والتنويه....على الزائرين الكرام الذين يكتبون التعليقات القيمة..أنهم عند مخاطبة الإناث يكتبون:
شكرا "لكى"
"دمتى" بخير
"جزاكى" الله خيرا
والصحيح أنها تكتب بغير"ياء".
ويفرق بين خطاب الإناث وخطاب الذكور بالحركات،
فتوضع الفتحة على نهاية الكلمة عند مخاطبة الذكور فنقول: "لكَ"، "دمتَ"، "جزاكَ"
اضغط }ض{SHIFT+
وتوضع الكسرة على نهاية الكلمة عند مخاطبة الإناث فنقول: "لكِ"، "دمتِ"، "جزاكِ"
اضغط } ش{SHIFT+
هذا من باب حب اللغة العربية والغيرة عليها...
"واللى مش بيغير.. يبقى مش بيحب"
مع الاعتذار للفصحى
وتقبلوا شكرى وتحياتى
والله كل انسان محتاج يقف مع نفسه شويه ويقيم الحالة إلي هو فيها ويشوف الصح فين ويعمله
وكويس انك وقفتي مع نفسك وتوصلتي للنتيجة دي
ربنا يوفقك يا رب ويسعدك
تقبلي مروري
مجنووون
حلو اوى عنوان البوست
بس وداعا للحزن
د.توكل مسعود
اهلا بحضرتك
مجنووون
اهلا بمرورك يا سيادة المجنون
arsenalwy
وداعا للحزن
نورت المدونة
بسمه وانتى كده بسمه يا بسمه
سيبى الحزن لناسه
بسومة الجميلة ،،
انا كمان نفسى كلنا نلبس نظارة وردية .. حتى نرى الحياة بلونها ..
واكيد بكرة فى امل .
تحياتى ،،
نفرتارى
فراشتى الصغيرة
طول ما انتى بطيرى حولينى كدة هفضل بسمة
نفرتارى
تصدقى الوردى حلو انا كمان بحب الوردى
طول ما فى بكرة يبقى اكيد فى امل
نورتينى ياسكر
حوارك اللي بينك وبينك دا ...
حسسني انك شفتي اللي بيحصل بيني وبين نفسي ..
انتي حد حلو أوي
انا......
انا فعلا اتعلمت من تجربتى اللى خلتنى اعمل الحوار دة
وانتى كمان باين كدة حد جميل اوى
اولا- انسى الحزن ولا اقولك اقتليه خالص
ثانيا- اتقى الله فى دينك ودنياك واهلك
ثالثا-حددى هدفك صح وركزى للوصول اليه
رابعا بقى ودى الاهم اضحكى دة انتى اسمك بسمة يا شيخة
**********
هههههههههههه صح كدا
بسمه
الواحد فعلا محتاج كل فتره يعمل حوار زي ده مع نفسه
يعني يعمل ريفريش
وان اقي نفسه مهنج
يعمل ريستارت
كيارا
نورتينر يا قمر
ابو العريف
علشان كدة انا عملت لنفسى ريستارت
اهلا بيك
كل سنة وانت بألف خير وسعادة .
تحياتى ،،
نفرتارى
نفرتارى
وانتى طيبه يا حبيبتى
حوار رائع
اتمني ان كلنا نحاسب نفسنا
حوار ممتاز
انا لسه كاتب موضوع زي ده قريب
اخر موضوعين علي المدونه بتاعتي احب اعرف رأي حضرتك فيهم
مصطفى احمد
اتمنى انا كمان
اهلا بزيارتك
حسن حنفى
اكيد طبعا لازم اشوفهم انشاء الله
نورتنى
بسمه وانتى بسمه فعلا
:)
حلو حوارك مع نفسك وانصحك اوعى تفقديه
وبجد عندك حق احنا السبب ان دنيتنا مش حلوة
احنا السبب اننا شايفينها سوده بس بجد ساعات بيحصل ده واحنا مش واخدين بالنا ويارب لما نفوق وناخد بالنا نقدر نعمل الى بتقولى عليه ده
سلامى يا قمر
:))
shayma
يارب يا حبيبتى نوشفها بلونها الجميل
نورتينى يا ثوكاراااااايه
بوست حلو جدا وممكن نقول انها بداية جديدة ليكي بس انا عايز اسأل سؤال ليه كلنا بنقول ان السواد اللي حوالينا بسبب النضارة اللي لبسينها مش ممكن يكون الوضع فعلا اسود كتير؟؟؟
هو مش تشاؤم والله بس دي تجربة من واحد قله كل النضارات الغامقة قبل كده
تحياتي
انا حر
برده اسال انا سؤال ليه هيا بقت سوده
اكيد احنا السبب بشكل او بأخر ممكن نكون مش واخدين بالنا بس اكيد مفيش ايد خفيه بظلم لنا حياتنا
نورتى يا سيدى
أههه لا مش رغاية ولا حاجة بالعكس كلامك جميل وشيق أوي ولذيذ بس موضوع الثانوية العامة دي حاجة مهمة اوي على فكرة يعني الواحد لو فكر انه ممكن يعد سنة او سنتين بيذاكر بضمير علشان نفسه يحقق حاجة في حياته أي كانت هيقدر بس هو لو فكر في الموضوع من الناحية الأيجابية مش من الناحية السلبية الي تخلي مزاجه متعكر وان الثانوية العامة دي حاجة تقرف , احنا مشكلتنا اننا مش حابين نتعلم بنحب نتكلم في اي حاجة وبس عندك مثال مثلا في امريكا الولد لما بيتم سن ال15 بياخد ثلاث اضعاف الي بناخده في الثانوية العامة وبينجح وبتقدير ممتاز كمان طيب اشمعني هما كدة واحنا مش كدة لأن مجتمعنا العربي في خمول مش بيفكر غير في الجنس والشرب والبنات والمصايف وتقضية وقت جميل وناسي كل حاجة وسايب كل حاجة على أساس ربنا هيوفقه , موفقة باذن الله يا بسمة وشدي حيلك وصدقيني مش هتندمي خالص والناس هتحبك اكتر مما تتصوري وعقلك هيتفتح وهتفهمي حاجات كتيرة حلوة والدنيا هتنورلك طريقها من جديد , تحياتي لكي بالعطور الفرنسية
إرسال تعليق