مرت طويلة ....متضاربة

اقبلت على هذا العام إقبالة ليست كغيرها .....

فقد قدم هذا العاموهى تميل للوحده والعزلة بعيــدا عن الناس......

فقدت الثقه فيمن حولها ... كرهت حياتها،تمنت لو انها تستطيع الهروب الى كوكب خارج هذا الكون.....

فى شهره الاول;سمحت لها الظرف فى التعرف على عالم آخر فأصبح هذا هو ملجأها الوحيد ، ربما كانت مخظأة , ولكن فى هذا العالم وجدت روحها او بمعنى اصح وجدت لنفسها روحاً توائم حلها آن ذاك .......

تعرفت الى كثيرين فى هذا العالم , ربما كانت تعلم ان منهم مخادعين كما فى واقعها ...ولكنها كانت تتناسى ذلك لتخرج مابداخلها من شحنة تكاد تقتلها .........

فى شهره الثانى;شعرت وان روحها وتوأم روحها ....تطورت علاقاتها مع كل من فى هذا العالم ....من المؤكد انها ترددت مراراً فى الاستمرار فى هذا العالم المجهول , ولكن نفسها ابت ان تتراجع فقد سيطر هذا العالم على حياتها .......

اما بالعوده إلى الواقع فقد كان كالعادة ملئ بالمشاكل التى افقدتها الثقه مجدداً فى الجميع ....

التحقت بالجامعه وهذا تغيراً جذريا لحياتها العلميه والعمليه .....

تطورت خلافات وانتهت خلافت , وبقت خلافات على وضعها فى محيط العائله ومنها ايضا ماهدد عاطفتها .......

فى شهر هذا العام الاخير تعرضت لحادث كاد يودى بحياتها , لولا ان ساعدها ربها ونجاها , ليمنحها حياة جديده ......

انتهتايام هذا لعام الذى لو سردت احداثه لدونت مجلدات لطول تفاصيله واضراباتها .....

انتهت شهور هذا العام لتطوى معها عاماً شديد الغرابه مودعا الماضى آملاً فى الغد......

انتهى هذا العالم وهى موقنة انها تغيرت تماااااااااماً.......

فى هذا العام وجد قلبها ضالته ......

وجدت حياتها العمليه والعلميه مستقبل ينتظرها , ربما لم تتوقع كهذا مستقبل , ولكن الله قدر لها الخير وهى موقنة بذلك......

فقدت فى هذا العام صداقات ومعارف كثيرة , ولكنها كتسبت اكثر مما فقدت فنحها الله صديقات كالأخوة فى هذا العالم الذى ظننته مجهول وكذلك فى عالمها لخارجى ......

انتهت لسنة , وانتهت معه كلماتها لتلك الأيام ......

تتمنى من ربها ان يديم عليها مساندته دئماً , وألا يحرمها مما كتسبته فى عامها هذا , وان يعوضها خير مما افتقدت .....

ملحوظه على جنب::: انا مش متفائله بـ2010 وعايزة افضل فى 2009

هابى نيو يير يا ناس يا سكر

يوم غير خالص....

السلام علــــيكم

يوم مختلف جدااااااااا


اليوم بدء كالآتى : طلعت من البيت عادى جدا فى ميعادى ونستنى مواصلات لايمكن ابدا نلاقى وقفنا ووقفنا ومازلنا واقفين اوم ايه بقى نلاقى ميكروباص جاى من بعيد كده ......اجرى وطلعنا نجرى عليه ....ملحقناهوش صلى انا لو هقف لحد لعصر مش هجرى على مواصله فى الزحمة ابدا........استنينا اللى بعده والحمد لله ربنا سهل وركبنا ......


روحنا الجامعه عادى جدا وحضرنا السكشن مش عادى جدا اصلى فضلت واقفة 33 سعات على رجلى ماانا اتأخرت وملقيتش مكان ........ماعلينا


خلصت المحاضرة بدرى على غير العادة استنيت برة لوحدى ساعه تقريبا مستنيه مها تخلص سكشنها .......خلصت الحمد لله وقولنا هنفر وفطرنا......... لو مشينا علطول مش هنلاقى مواصلات فاضطرينا نقعد لحد بعد الضهر ....مها قالت هنمشى نروح شركة فودافون تصلح تليفونها وبالمرة كمان هتجيب فطييييير لماماتها وقد كان ....... مها من خوفها على فطيرة امها واحده خبطت الكيس من غير قصد مها صرخت فيها وقالتلها عورتى الفطيييييييييرة , البت تنحت ولما استوعبت الكلام ضحكت ومشيت فى حالها


مشينا مشى كتييييييييييير من هنا كده لحد هنااااااااااااك ومع المشى بقى ده كله واحنا فجأة جالنا هستيريا ضحك , وبقينا بنضحك بسبب ومن غير سبب ...........


ضحكنا جامد اوى وانبسطنا كتير فى اليوم ده كنا بنضحك بهبل اوووووى لدرجه ان واحد فى عمر جدى كده معدى راح قايلنا ربنا يشفيكم ههههههههههههههه


مها كان عندها حاله برد وزكام كما هو حال الشعب المصرى حاليا وعايزين مناديل لاقينا بنوتين حلوين كده قاعدين فى جنب لوحدهم راحت مها وقالتها ممكن منديل وابتدئت شغل التسول


روحنا الحمد لله كويسين ومن غير اى حوادث ولا اسعافات
شوفو بوست مها كمان هـــــنا

عوده بعد ....

السلام عليكم.......

كل سنة وانتم كلكم يبين وبخير ان شاء الله
انا غيبت كتير بس مغبتش اوى يعنى .....شكرا اوى لكل اللى سألوا عليا واللى مسألوش برضو
اكيد يعنى كان لازم خد فترة ريست لنفسى يعنى والحمد لله اخدتها وانهارده انا فى منتهى السعادة والرضا والإطمئنان الحمد لله ......... ونقدر نعتبر البوست الاخير ده لم يكن انا عن نفسى عملتله دليت من ذاكرتى وحذفته كمان من المدونة
بكرة ان شاء الله راس السنة الهجريه كل سنة وانتم طيبين دايما ويارب السنة الجاية افضل
وباقى ايام كمان وتبدء السنة الجديدة 2010 انشاء الله ايه رايكم نكتب عن ذكريات 2009 واهم الاحداث اللى حصلت معانا فيها ........ فى انتظار بوستتكم انشاء الله

وبس كده خلاص

وحشتونى

وحــشتــونــى جــــــداً

ودااااعا

انا البت الحلوة اللى على الشمال الهاديه الكميله دى هههههههههههههههه

كانت ايام حلوة اوى ... كنا برئاء جدااا وتلاقائيين خالص ....انا قولت بما انى بقى وبحمد لله اتعتقت من ايام المضارس وبقيت البه جامعيه احكى بقى عن ذكرياتالمدرسة ومراحل التعليم

تنبيه:البوست طووويل اللى هيزهق ميقرئش ... لا استنو رايحين فين القرائه اجبارى هههههههههه

ايام الحضانة كنت انا فى الكويت بابا كان عايز نتعلم انجلش فبالتالى روحنا حضانه انجليزيه وكنا هنكمل فيها لحد الابتدائى قضيت السنتين حضانه فيها وكانو سنتين حلوين فاكرة مرة الميس أخدت منى كاميرا لعبه كان بابا جايبهالى من الحج وانا بقى كنت فرحانه بيها ولعتها فى الفصل اوريها لاصحابى بس اتاخدت منى ... تصدقوا انا زعلانة عشانها لحد انهارده ههههههههههه ..... مش هفضل كتير فى الحضانة اكيد طبعا دخلت الابتدائى

انا كنت بطبعى انطوائيه اووووى ومكنش ليا اصحاب كتير هى كانت صاحبه واحدة بس ومكنتش بكلم غيرها جيت فى نص الابتدائى بابا قرر اننا هنرجع مصر وهنفضل هناك ونكمل تعليم هناك من اول تالته ابتدائى بقى وانا فى مصرنا العزيزة تقولوش بقى انا اتفردت على العيال وبقيت جريئة بقى وبتلامض مع الكل مرة وانا فى رابعه ابتدائى دخلنا مدرس مكنش عاجبنى وكان خشيم بيضرب العيال عمال على بطال كنت انا عامله فيها الفتوة اللى فيهم صبيان وبنات نزلت للمديرة وشكتلها منه ونقلته من فصلنا خالص ههههههههههههه وحشه انا اووووى صعب عليا والله

وانا ف الاعدادى بقى كنت هااااااااااااااااااااديه جدااااااا متعرفوش يه سر التغير الفظيع ده السر بقى ان ماما كانت مدرسة معانا فى الاعدادى فكان لازم التزم الهدوء والصمت واالادب ....الاعدادى دى تعتبر اسوء مرحله مرت عليا تعبت فيها نفسيا جدا صاحبت على بنات هما مش وحشين بس مش دول الل كان المفروض اصاحبهم تعبونى كتير نفسيا واتاخدت على افايا كتير او وصاحبت كتير فى الفترة دى وكل مرة اخد مقالب بس كله الا مها بعا مها بقى عرفتها فى الاعدادى ولسه اصحاب لحد انهارده الحمد لله اه دى اللى طلعت اصلى مش مقلب اييييييييييييييييييييه اهى مرحله وعدت الحمد لله ف تالته اعدادى بقى ماماتى روح قلبى كل ماتشوفنى ذاكرى ذاكرى لو مجبتيش مجموع ثانوى هتعيد الثانوى معنديش حد يدخل تمريض و تجارة خالص .... وكان الزن ده واحد من الاسباب اللى اجيب مجموع الثانو بمعجزة

دخلنا الثانوى وبجد بجد كانت احلى ايام .......ف الفترة دى بقى ف اصحاب بجد بنخاف على بعض بجد ومع بعض علطول فى اول ثانوى اتحفيت كنت مقضياها يعنى بس اذاكر وقت الامتحان بس الحق يتقل كنا فى امتحانات الشهور المفكرات الصغيرة بتعمل احلى واجب كنا نشقطها لبعض محنا اصحاب ههههههههه ولما بيبقى الامتحان الف وباء كنا نبدل مع العيال عشان تبقى الشله كلها امتحان واحد المهم بقى خلصت اولى ودخلنا تانيه بقى كانت من غير اعمال سنة يعنى البلجه للركب كنا ممكن نسيب الحصة وننزل الكنتين نروح نقعد فصل تانى مع اصحابنا ههههههههههههه مرة كان هيتعملى مذكرة عشان سبت الحصة ومشيت عملت فيها تعبانة وانى سبت الفصل لانى تعبانة وكنت رايحه للمرضة وعدت بسلاام فى تانيه جبت مجموع لطيف بصراحه اى تعبت من هول الصدمه والسنة اللى بعدها محركتش ساكن كانها اخدت مضادات للصدمة

وخلصت ايام المضرسه الحمد لله ودخلت الكليه وبقيت طالبه جامعيه فى حقوووووق عمرى ماتوقعت للحظة انى ممكن هدخلها انا كان نفسى ادخل اداب علم نفس او تجارة بس محصلش نصيب الحمد لله على كل حال

وبعدين حد يطول يبقى فى حقوق ياجدعان دى كليه العظمااااااء



يااااااااااااااااااااااااااااااااااه كل ده رغى يلا كفايه كده انا تعبت اصلا ربنا يقويكم عشان اضمن انكم تقرئو البوست كله اللى يوصل للاخر يقول انا عملت ايه عشان ميتعمليش مذكرة ....... متفقيييييييين؟؟

وقولولى بقى بما اننا عل ابواب الضراسه تقولو ايه للمضرسة ؟؟ وبلمرة الاجازة تقوللولها ايه؟؟



يلا سلااااااااامووووو عليكووووووووووو

حروف الحب

اعزائى اخوانى سادتى سادتى .... ياهلا بيكم والله منورين دايماً

انا كان عندى مدونة قديمة حد فاكرها ايوه كانت الاول الغد آت وبعدين بقى اسمها رومانسياتى الموهم بقى انا بجيب سيرتها ليه بقى ....؟؟؟ دماغى اليومين دول ف حاله ركود فظيييييييييييعة وكمان انا كمان فى ركود تااااام ..... فانا قولت ايه بقى يعنى الفترة دىعلى مانفوخ ينتعش ويفرفش انقل بعض البوستات اللى كتبتها هناك هنا واهو يبقى الل مشفهاش شافها واللى شافها يفتكرها عشان مينساهاش ....ولا ايه ؟؟؟

كفايه رغى بقى ونكتب البوست الاصلى........

===========================

الالف:احببتك ذات يوم ...ما انا الا قلبا بك ينبض فهيا عد

الباء :بكى دمعي ولاأجلك .. سأتحدى الكون لاشيء يثير رغبتي في البقاء .. سوى أنت

التاء: ترعرعت على جنان صمتك ونشأت في كنف سكونك ..قد حفرت قصيدة على صفحات الروح وحروفها أنت يانبض القلب.

الثاء: ثورة .. براكين .. عواصف شوق جامحه ماتلك سوى صدى رحيلك ..كم أشعر بالخواء في بعدك .. وبإنحسار الكون

الجيم: جميلة أنتي مليكتي .. تلك همساتك الأقرب لقلبي كم أفتقدها منك.

الخاء:خوف ينتابنى ....يجرى فى عروقى ....يسكننى سرداب مظلم اتخيل للحظة انك لن تعود

الدال:دفئ صدرك .... همسة شفالك...لمسة يديك...اشعر بك تلامسنى بشوق حتى بالخيال

الذال : ذرات الم مبعثره في ارجاء القلب .. تعال الي لتمسح بريق الدموع من ناظري .. فقد أرهقني الأنتظار.

الراء : رسمتك لي بدر.. يضيء دروبي؟ لاحرمت من نورك .. يانور القلب .
الزاى: زرت وتأملت شجرة قلبي ورقة ورقة (أحبـــك) كلمة وجدتها مسطره لك وقد أحتلت كل السطور.

السين: ستحيا للأبد بقلبي.. عن ماذا تبحث؟ألم تصلك الفكرة بعد.. أحـــبك .. وسأظل أحبـك.

الشين: شعرت بك رغم طول المسافات رغم الحواجز والجسور .. ستبقى دوماً حب لقلبي.. همساً لروحي .. طيف لأحلامي.

الصاد: صعبة هي بعض الأمنيات أتمنى أن تكف عن أرسال علامات الأستفهام أو التعجب تلك قد أكون مختلفة أ ومجهولة لاتنسى أني قد بت بحبك مجنونه

الضاد: ضاعت الحروف مني .. أتعلم لم؟خُيل لي للحظة أنك معي تناظرني بعيينيك.

الطاء:طاف حولي حلم تراءى لي كالسحر في روعته .. خاطبت فيه النجوم وسامرت القمر قد كنت أنت الحلم يا أنفاس عمري.. نعم أنت لاسحر سواك .

.الظاء : ظلام دامس ليلي بدونك .. تتبعثر به نجوم باهته مسروقة الألوان ..يلسعني بعدك.. عد الي .. لا أقوى الأنتظار!

العين: عيناك ساحرتان ملهمي.. كلمات مخملية نطقتها شفاهك يوماً.. تركت بالقلب ذكرى جميلة ولهيب قاتل

الغين: غريب أمري .. أراك لي نوراً وأحياناً أخرى أراك لي شقاء .. أعلنها حقيقه أشعر أحياناً أنني قد أفرطت بحبك ولا زلت أحبك

الفاء: فقط عند الكتابه إليك .. أجد أني عاجزة عن انتقاء الحروف الأجمل.

القاف : قمري أنت .. قد أدمنت ثرثرتي إليك .. متى ستعود.

الكاف: كيف أدمنتك الى هذا الحد؟ كثيراً ما أتسأل .أجدك نبراساً يضيء طريقي لذلك أدمنت فمن يهوى الضياع؟:

اللام: لم ولن أنساك .. ولن تنساني .. تلك البداية وستكون النهاية .

الميم: متيمة أنا بك لا بل أكثر .. أعذرني لم أجد وصف يرضيني

النون: نادر أنت بين البشر .. كيف لا فأنت من تصفو الروح إليه .. أنت لي كالنبض لا كالفؤاد.

الهاء: هل لحبك حدود؟ لا أعتقد .. عاشقة أنا لك بالطول والعرض من السماء إلى الأرض.. لاحدود لحبك اللا

الواو: ورود بستانى جفت...بى رعشة طائر يهفو الى الدفء فأين انت؟

اليك يا اغلى انسان ارسل بكلمات الضئيلة تلك.......

مبروك ياقمرنا

قولت انا باين من كم يوم ان فى خبر حلو

اقول بقى .....مستعدين

*

*

* انهاردة بقى اختى وحبيبتى وروح قلبى واكيد حبيبتنا كلنا يعنى مفيش اعتراض

هتتقرى فتحتها انهاردة لللللللللللووووووووووللللللللى((مش بعرف دة انا شحتاها من حنجرة واحده تانيه ))

غابت عننا كتير اوى ولما رجعت رجعت باجمل خبر حلو وباحلى فرحة .......

ربنا يوفقك يارب ويسعدك يا روح قلبى من جوا

ربنا ويتملك على خير يارب

انا عماله ارغى ومقولتش هى مين ههههههههههههههه

دى ياناس شـــيمو القمر ايييووووووة اعترافـــات قلب

يلا على هناك بقى باركو وهنووزغرطو واللى بيعرف يرقص يرقص المهم يعنى زبطوها احنا لينا يعنى كام شيمو

مبروك يا احلى قمر فى الدنيا .... مبروك ياشيمو يا سكرايه ...... ربنا يسعدك يا حبيبتى

يلا انطلقو بقى

سلاموووو عليكوووو

جانا العيد...

الاول واولاٌ كل سنة وانتم طيبين وكل سنة وانتم عسولين وكل سنة وانتم اصحابى علطول احسن ناس

شوفو عشان نبقى على نور اللى هيدخل يسب العيديه على الباب ولا هو عشان بقيت طالبه جامعيه كبرت على العيديه لا والف لا كل الا كده

كنت عايزة اكون اول حد يهنيكو بالعيد بس نعمل ايه من القضاء المنزلى اللى حكم علينا منشوفش راحه قبل الساعه 12 بالليل والحمد لله تمت العمليه بنجاح وباقل الخسائر

العيد بالنسبالى صلاه العيد الصبح وان اشوف الناس واشوف صحباتى الصبح ونهنى بعض بتبقى فرحه كبيرة بجد هو ده العيد بتاعى بقيت اليوم بيبقى يوم عادى جدااا ..........

بس انا مبسوطة الحمد لله وفى حاله انكشاح نفساوى ومش لاقيه رغى ارغى فيه بصراحه فكووووووووووول سنة وانتم طيبين وبخير وسعاده وهنا وفرفشه وزقطته يارب دايما

ملحوظة صغنتوتة:فى خبر حلو جداوبسطنى جدا لما عرفته انهارده هبقى اقولكم عليه كمان يومين ان شاء الله بس كده خلاص

سلامووعليكوووو

بعشق الورد

لغة تتخطى كل الحواجز الجغرافية .....لا تفرق بين جنس ...او نوع ايجادها غاية فى الرقى... فهم دلالاتها فى التحاور بها قمة الذكاء... ولان البعض لا يجيد التعامل بلغة الورد اليكم بعض المعانى ومدلول كل وردة ولونها المفضل ...ولانى بعشق الورد وبعشق الوانه ....

الورد الأبيض:ترمز للصفء وتخاطب بها المرأة السويه....فهى تعنى البرائه والاخلاص فى الحب...

الوردة الحمراء: ترمز لقمة التوهج العاطفى وتخاطب المرأة ذات العاطفه القويه , بإختصار الورده الحمراء تعنى **بحبك بجنون**

الورة الروز: ترمز الى العاطفه الدائمة التى لا تتغيرويخاطب بها المحبة برزانة لان هذا اللون الهادئ يتماشى مع هدوئها ورزانتها ....

الوردة البنفسجى: ترمز الى الحب فى صمت وهى تخاطب المرأة المتواضعه والخلصة كما تشير إالى الأمانة ف الحب ....

الوردة الزرقاء: اصلها وردة بيضاء ترمز الى الكمال وتخاطب المرأة العاقله والرزينة ...وتعنى **انت دائما محل تقدير رغم زحام الحياة....

الورده الصفراء : قديما كانت ترمز للغيرة اما الأن قد تغير هذا المدلول واصبحتتشير الى الصداقة وهى تعنى عبارة **افكر فيك دائماااا**

الياسمين الأبيض : يخاطب المرأة المتمردة وتعنى **لماذا لاتحبنى بدا؟؟**

زهرة الكاميليا: رمز المحبة والتقدير بين الاهل والاصدقاء والاحبة .....

القرنفل:دليل الحب العميق النقى...الابيض منه يخاب الشخصية الشكاكة....

زهرة التفاح : ترمز الى التفائل وحسن الطالع ويفضل استخدامها قبل الدخول فى ا مرحله جديدة ....

زهرة الليلك: ترمز ال الحب الاول ....

زهرة برعم البرتقال : يرمز الى السعادة والخصوبة لذلك جرت العادة ان يستخدم لباقات العرائس ....

زهرة اللبلاب :يرمز الى الاخلاص.....

============================

بخلاف الانواع والالوان فالاعداد لها مدلولاتها ومعانيها .....

الورده الواحدة تعنى :اعظم درجات الحب حيت لاشريك فى قلبى سواك

الوردتان:الرغبه فى التلازم الى الابد

ثلاث وردات :كلمة احبك والى الابد

اربع وردات: نفسى عمرى الجاى اعيشه معاك

خمس وردات:الحب الابدى

الست وردات:الصداقه الصادقة

انا بحب الورد الاحمر والازرق والروز جداااااااااااااااا .....عدد الورد واحده ...اهديها لمين هو عارف نفسه (صح ولا لاء ) ....

بس كده خلاص ياريت كل اللى يقرء الموضوع يقول وردته المفضله وعدد الوردات ولمن يهديها دة اجبار على فكرة

ملحوظة ضغنتوتة ... الموضوع منقول بس عجبنى او يارب يعجبكم

زى انهاردة ....

زى انهارده من سبعتاااااااااااااشر سنة ماماتى تعبت شويه ال ايه انا بستعجلها عشان انور الدنيا وقد كان على الساعه التاسعة مساءًفولت الكهربا زاد فى الدنيا كلها اتارينى شرفت الدنيا وبدئت الدنيا تهلل وتفرح وتزقطت بوجودى ما انا اول فرحم والدنيا مكنتش سيعاهم وبقدومى قدم الخير واحلوت وزهزهت وكنت انا وش السعد المهم بقى يعنى ايه انهارده يا جدعان انا عندى 17 سنة سامعه اللى بيضحك ويقولى بيبى بس مش مشكله هعديها.......

زى انهارده السنة اللى فاتت انا اعتبرتها سنة كبيسه كان اسوء سنة مرت عليا فى حياتى كانت فيها المفاجائات التعيسة كلها بترف على نفوخى وانا قاعده لا بيا ولا عليا وختمت بيوم ميلادى اللى محدش افتكره ولا عبرنى واتسجل عام 2008 عام كبيس فى حياتى وبرضو الحمد لله عديتها واستقبلت الاتى بصدر رحب والحمد لله كانت السنادى من اروع سنين حياتى الحمد لله واكتملت فرحتى بيوم ميلادى اللى هو انهاردة 11/9/2009 ..........

بفتح الفيس بوك لاقيت تهنئات من اصحابى قولت ياربى الناس دى بتهانى على ايه هو العيد جه بصيت فى النتيجه وفوجئت انه يوم ميلاد فرحت اوى ان فى حد افتكرنى وشويه ولا قيت تهنئات على الميل وشويه كمان ولاقيت صحباتى بعتالى مسجات على الموبايل كنت مبسوطة جدا الحمد لله الصبح حد غالى عليا جدا واغلى من حياتى بعتلى الاغنيه اللى على باب المدونة دى على ايديكو الشمال لازم تسمعوها اجبارى على فكرة عشان معرفتش احطها غير كده وبعدين لاقيت اخواتى حبايب قلبى جايبن ليا هدايا بجد كنت هطير من الفرحه وانهاردة بالليل ماماتى جابتلى تورتايه وعملتلى بارتى صغيووورة على قدى كده وبس كده ............

التورتايه دى جبتهالى مامتى حبيبتى ونصها شكولاته عشان انا بموت فى الشكولاتهدى من عبير

ودول من هبة ومنار اخواتى

دول بقى صور الهدايا اللى جابوهالى اخواتى والكارت ده من مريومة اختى الصغيرة وهى اللى كتباه بايديها ((كل سنة وينتى طيبة اعبال 100 سنة ياروح القبى ))ده كلامها ورسمت هى القلب ده وحطت حرفى وحرفها

بجد ميرسى لكل اللى افتكرونى وخصوصا دودو عاشقه الرومانسيه وكيارا وشيماء حبيبتى وصحباتى فى الفيس بوك وعلى الميل والموبايل ربنا يخليكم ليا يا اغلى اصحاب

يلا بقى كفايه عليا كده انهاردة اقوم بقى انام ... تصبحوا على خير

حبيبى

زهرة انت فى بستــانى

بين ضــلوعى انــت ســاكن

اعــيش على صورة لــك فى خيــالى

اتوسل بها الى الدهر ليركض بى اليك زمانى

يازهرة انت فى بستانى

ينتشر عبيرها فى احلامى

وتحــــلو بحســـنها ايــــامــى

ياعيونا اضاءت بها حيـــاتــــــــى

ياحباً ملك علىَ كيانى

كن انت دائما لى حبيبى زهرة فى بستانى

...لــك...

انقطاع مفاجئ...فضفضيات

السلام عليكم

ازيكم يا اجمل اصحاب .... طبعا حصل كده حاجات ادت الى انقطاع فوجائى فى التيار النتاوى المرسل لجهازنا العزيز وبناءً عليه ادى الى انقطاع فوجائى برضو عنكم يا غالين ...معلش عارفه انى مقصرة نوعاً ما (( الـ يعنى انا فارقه مع حد ولا حد بيسال اصلا .... ماعلينا))

الصيام فى الكويت طبعا ملهوش طعم زى مصر واللمة والمسحراتى و الكنافه والقطايف والفانووووووس مفيش من ده فى الكويت خالص

بروح اصلى التراويح مع ماما بس برضو مش بتبقى زى مصر بس هنا المقرئين صوتهم رائع جدااااااا والمساجد هنا قمة فى الفخامة

طبعا هنا بنفطر قبلكم بساعه واليوم بيخلص برضو قبلكم بساعه

انبارح كنا فى السوق بنشترى حاجات وبعدين الست اللى بتبيع هناك عرفتنا من كتر ما بنروحلها فماما كانت بتتكلم معاها وبعدين سمعت انها هنا فى الكويت بقالها اكتر من 12 سنة تقريبا منزلتش مصر ...وحكت لماما وهى بتبكى انها كانت هنا فى الكويت من زمان عشان تجهز لجواز بنتها لان جوزها متوفى ولما بنتها اتجوزت ماماتها دى رجعت الكويت وفى مرة كانت نزله اجازة لمصر لاقيت بنتها كسرلها شقتها وواخده كل العفش اللى فيها وكتبت الشقه باسمها ومنعت امها تدخل شقتها ... وقالتها شوفى هتدينى كام وانا اسيبهالك . ..ايه؟ هتبيع الشقه لصاحبتها ازاى؟؟ فالست رجعت الكويت ومن يومها مرجعتش مصر بقالها 12 سنة

بجد لما سمعت الكلام ده قولت فى ايه للدرجه دى البنت دى قبلها قاسى اوى كده على والدتها اللى سافرت برة نمصر عشان تجوزها وتعيشها فى احسن مستوا للدرجه دى مفيش رئفه ولا الرحمة فى قلبها ........ الست ختمت كلامها وقالت ربى هياخدلى حقى منها لما اولادها يكبروا

بس كده خلاص

انا قولت افضفض وارغى شويه قبل الانقطاع الفوجائى ميرجع تانى

اه صحيح انا رجعه مصر يا جدعان اخر الاسبوع .......مبسووووطة اوووووووى سبحان الله ربنا شاء تحصل حاجه فوجائيه برضو عشان انزل مصر احمدك يارب

بس كفايه كده خلاص

سلامو عليكو

رمضان جانا هييييييييييه

كل سنة وانتم طيبين وانتم الى الله اقرب...رمضان كريم.

,بجد بجد احساس تحفة , بحب رمضان اوى شهر رمضان((محدش يسرح لبعيد ههههههههه)) , بستنى ايامه اوى ...بيبقى ليها طعم تانى ومختلف خالص بحس فيه بكميه امن رهيبة وهدوء وسكون على روحى من اول لحظة السحور لحد لحظة الفطار ....

يالله على الايام دى بجد بستمتع بالشهر ده اوى وبحب ذكرياته جدا....ده اول رمضان ليا فى الكويت لاهو مش اول رمضان بالزبط انا مولوده فى الكويت واول 9 سنين من عمرى كان رمضان بيبقى هنا ... بس طبعا مكنتش ببقى مستوعبه رمضان زى دلوقتى ...فاكرة زمان كان بابا بيصحينى انا وعبير اختى <قبل ما نبقا اخواتات كتير> كنت ببقى قايمة مدروخه طبعا ونايمة على نفسى وبطوح زى كما المساطيل بس كنت بفوق لما بشوف عبير كنت بموت من الضحك كانت بتتسحر وهى نايمة مغمضة عنيها ودماغها يدوب مسنودة وممكن تنام شويه وتقوم تكمل اكل ... كنت بهلك من الضحك عليها وافوق على منظرها ده .... بعد السحور بابا يقول معانا الدعاء ويوعدنا اللى هتصوم لحد المغرب هتاخد ربع دينار وبعدين نقوم نصلى الفجر وعبير تبقى لسه نايمة وممكن تنام وهى ساجده ونفضل طول النهار نلعب ونشوق بعضنا على الاكل عشان واحده بس اللى تاخد الربع دينار عبير كانت احيانا بتضعف وانا افتن عليها لبابا واحيانا العكس ولما كنا نفطر انا وهى نحلف لبعض اننا منقولش لحد عشان ناخد الربع دنار نصر فنصه والباقى نحطه فى الحصاله ويوم العيد نكسر الحصاله ........ اول رمضان قضيته فى مصر كان عندى تقريبا 10 سنين كنت اعمل فيها تعبانة وبما انى جسمى ضعيف فكانت بتدخل على ماما وتخلينى افطر , ساعه السحور جدو كان يجيب كنافه وهو جاى بالليل ويخلى ماما تعملهالى عشان اكل منها على السحور واوقات يجيب برتقال ويقشرهولى عشان اكله على السحور برضو , وستو برضو يوم رؤيه الهلال كانت تيجى بعد المغرب وتجيبلنا فوانيس رمضان وكان ماشاء الله بيتعدم العافيه... ولما كبرنا شويه بقينا انا وعبير نتسابق مين هتخلص القرآن الاول مرة مكناش بنخلصه ومرة كانت هى ومرة كنت انا اخلصه ونفضل صاحيين لحد السحور ونروح المدرسه تانى يوم نايمين على نفسنا ....وياسلام بقى على العزومات معروف كده ستو بتعزمنا يوم احنا وخالاتى وقرايب ماما ويوم عند عمى ويبقوا عماتى وقرايب بابا وفى كلتا الحالتين لازم وحتما ولابد نروح انا وعبير نساعد مع مرات عمى او مع ستى ومرات خالى ........ ومها صحبتى كمان لازم تيجى تفطر معايا يوم او اتنين على الاقل وانا كذلك.... بس السنادى بقى هيبقى رمضان غير خالص هيبقى رمضان من غير عبير عشان هى نزلت مصر وكمان من غير مها ومن غير عزمات ولمة عمى وستى ....وكمان بقى هقضيه من غير جو المدرسة والدراسه ووجع القلب ده ... عشان كده هحاول اقضيه بشكل ايجابى اكتر هحاول اطلع منه بذخر لباقى السنة مش لازم يعنى اتابع كل المسلسلات ولا البرامج كلها اصلا لو عملت كده مش هلاقى وقت اتفرج عليهم كلم من كترهم ...وبعدين دى فرصه رمضان الستنادى قبل الدراسه يعنىهقدر ان شاء الله اعمل حاجه مفيدة .......يالله قد ايه متشوقه للحظة السحور انهارده.........

منى ليكم كلكم فوانيس رمضان كل واحد يختارلوا واحد بس بنظام مش عايزة هرجله

كلكم هتاخدو

كنافه وجلاش للسحور او للفطار انتو ومزاجكم بقى .. بالهنا والشفا



ومتنسوش التمر .... لازم على الاقل 3تمرات على السحور وزيهم على الفطور

وبس كده كفايه ذكريات وعيشتكم ,فوانيس وجبتلكم ,اكل واكلتكم... المهم تكونوا مبسوطين واللى زعلان منى فى حاجة يعديهالى دلوقتى وبعد رمضان هقعد معاه قعدة عرب كده ونشوف ايه اللى مزعله

كل سنة وانتم طيبين

فرحانة برمضان اوى وخصوصا ان ده اول رمضان ليا معكم كمان ...........رمضان كريم

التعليق من هنــــا

التاجات ليها ناسها

وادى جزاء اللى يأجل واجبه .....فاكرة كده من زماااااان بس مش من زمان اوى يعنى من ايام ماكنت بنطحن انطحانات الثانويه جانى تاج صغنون من حبيبه قلبى شيمو القمر وكان جانى قبله واحد برضو بس ده الحمد لله عملته ودة اجلته وادينى جانى عليه واحد كمان بس بقى هعملهم مع بعضيهم التانى جانى من الجميله اللى وحشانى مووووت جودى يلا بقى استعنا عالشقا بالله

بسم الله .....

تـ1ـاج

س/اذكر خمسه احلام على الاقل تخص ماضيك وتحلم فيها بتغير اشياء..فماذا ستعدل وماذا وستترك؟

1-ايام ماكنت بحفظ قرآن وحفظت 11جزء ..كنت هستمر فى الحفظ لحد ما اخلص القرآن

2-فى الاعدادى صاحبت ناس مكنش المفروض اصاحبهم ..كنت هصاحب الناس اللى تناسبنى اللى هيخدونى لفوق مش لتحت

3-من حوالى 3او4 سنين كنت هحافظ على مشاعرى اكتر من ماكنت وقتها

4-مواقف فى حياتى كتير ...كنت اتمنى لو كنت اتصرفت فيها بشكل افضل



س/اذكر خمسه احلام على الاقل تخص مستقبلك...؟

1-مستقبلى كله متوقف على رضا ربنا عليا ورضا ماما وبابا دة حلمى بجد

2-احقق املى بابا فينا انا واخواتى واعوضه تعبه علشانا

3-احقق حاجه كويسه فى الكليه اللى هبقى فيها بصرف النظر عن كونها ايه

4-ان اعيش فى دنيا كلها حب وسلام وهدوء جميل

5- افضل مع حبيبى علطول


س/اذكر شخصين على الاقل متواجدان فى حياتك حاليا كنت تتمنى وجدوهما قبل الان بزمن.....؟

كل اصحابى فى المدونة وفى غيرها اصحابى فى االمدرسه اكيد لو كنت عرفتهم من زمان كانت حياتى هيبقالها شكل تانى

وحبيبى اللى كنت بتمنى وجودو معايا من زمان


س/اذكر شخصين على الاقل ...غير متواجدين فى حياتك حاليا كنت تتمنى وودهما فى حيياه اولادك مستقبلا...؟

طبعا رسول الله عليه اللصلاة والسلام

وجدى لامى كنت بحبه جدا وكان حنون جدا كنت اتمنى ان ربنا يمد فى عمره عشان اشوف حنيته على اولادى مستقبلا طبعا


س/تحدث عن سته اسرار قد لايكتشفها من يقابلك للمرة الاولى...؟

طيبه جدا فى التعامل

متواضعه ..كتير قبل ما يتكلموا معايا بيفكرونى متكبرة ومغرورة مع انى مش كده خالص

مرحه...كتير بياخدوا عنى فكرة انى هاديه ومكتأبه دايما

خجوله جدا

ذكيه الحمد لله...ممكن بيفتكروا انى ساذجه او ممكن يضحك عليا بس الحمد لله لاء

عنيده جدا ...لما يكون ليا حق


س/ تهدى التاج دة لمين....؟

واخيييييييييييرا

لـ جودى

لـ بسمة صلاح

لـ الشيماء صلاح

لـ ايمان روحى

لـ زهرة الحب

لـ eyad

لـ ايوشه

لـ شقاوة مراهقه

كفايه كده....بس انا ليا سؤال بقى هو مين اللى عامل الاسئله دى وماله بيحب رقم خمسة اوى كده ههههههههه


نبتدى التاج التانى ولا نأجله انهاردة....؟ نأجله؟

خلاص بما انكم عيزي تاجلوه انهارده فانا هعمله النهارده هههههههههههه

يـــلا

تـ2 ـاج


س/اذكر 10 اشياء صادقه فى حياتك...؟

اولا: وجودى فى الحياه

ثانيا: ربى ودينى وكونى مسلمة

ثالثا: انى اكبر اخواتى

رابعا:ماما وبابا وحبهم وفرحتم بوجودى معاهم

خامسا: حبيبى

سادسا: اصحابى كهم فى المدونة اللى بعتبرهم عيلتى التانيه

سابعا: صحباتى الانتيم الاوى مها اللى هى صحبتى من 6سنين وبسمة صلاح اللى هى نصى الغالى

ثامنا: خلصت ثانوى وبقيت طالبه فى كليه الحقوق

تاسعا:بحب كل الناس وصادقه جدا فى التعامل مع اى حد

واخيرا عـــاشرا:انى فى الكويت دلوقتى وعايزة ارجع مصر واعيد فى مصر


واخيرا هنمرر التاج الصغنتوت الطويل ده لمين...؟

امرره لنفس اللى اتمررلهم التاج الاولانى (ايه المرارة دى) نعيدهم تانى بس بإستثناء طبعا اللى حلوه قبلى

لـبسمة صلاح

لـ الشيماء صلاح

لـ ايمان روحى

لـ زهرة الحب

لـeyad

لـ شقاوة مراهقة

لـ ريحانه الاسلام


بس خلاص ..........وعملت الواجب هيييييييييييييه

كل سنة وانتم كلكم بخير وطيبين ....رمضان كريم


علق من هنــا

ياسعدك يا مصر بحكومتك

السلامو عليكو

شوفتو الهنا اللى احنا فيه شوفتو فرحتنا بحكومتنا اللى زى العسل النحل ..الحكومة اللى بتحب شعبها ولاتقدرش تزعلهم ابدا....اومال ايه اصل احنا دول فى منتى الديمقراطيه ......مفيناش وزارة ولا عضو فى حكومة يعمل حاجه من غير مايخد راى الشعب والشعب يقول امين موافقين ...عارفين لو واحد فى الشعب قال لاء معترض بيلغوا القرار نهائى .....ايوة طبعا ...شايفه ناس لسه مش مقتنعه بتاتاً بكلامى ....هقنعكم انا

بصو شوفتوا عمركم دوله مبتسرقش شعبها ... اكيد احنا طبعا ؟ شوفتو دوله عمرها ما ختمت على قفا ناسها ....ايوووووة يا جدعان احنا الشعب الرائد على مستوى العالم اللى ماتختمش على قفاه...طب عمركم شوفتوا حكومة فاضيه ومخلصه كل اللى عليها زى حكومتنا ....ايوة فاضيه جداااا لدرجه انها بتلعب مع شعبها ...اهو تتسلى وتسلى الناس المكبوتة... بتشيل فى قرارات وتحط فى قرارات وكووووووول ده عشان خاطر شعبها الفاضل طبعا

ياشيخ بلا هم جتكو داهيه فقرتونا بمخاخكو العيانة دى ....

كنا بنتسرق من ورا ظهرنا وعملنا نفسنا عبط .... وكان بيضحك علينا من غير ما ناخد بالنا ونستعبط ونقول دة بيضحكولنا ....لكن نتسرق عينى عينك كده وعلى الملأ ولا يبقلناش قيمة ابدا كده ويعملونا زى الكورة الشراب اهو دة اللى مش ممكن ....

حكومة تغم جتكوا القرف ... داهيه تحرق دمكم...

انا مكنتش فاهمة الحكايه ايه بالزبط بس لما دخلت مدونة كاريكا طظ قدراً قرأت وفهمت وياريتنى ما فهمت دى مصيبة والله مصيبه ياريت اللى مزرش المدونة دى يزرها واللينك موجود اهو يفهم ويعمل بالحلول اللى قالها الاستاذ اشرف ودة كمان لينك كويس هيفدينا نفهم اكتر

شوفتوا بقى حكومة فاضيه زى حكومتنا ....شوفتوا حكومة ديمقراطيه زى حكومتنا .... مش قولتلكم عسل نحل يا اخواتشى.....

علق من هنــا

انا مسامحه

السلام عليك

وحشتونى جدا ...البوست انهارده هتكلم عن حاجات كتير ...اوك؟...مستعدين؟...طيب يلا بقى توكلنا على الله

بسم الله.......

مبرووووووووووووووووووووووووووووووك كبيرة اووووووووووى لدودو يارب يهنيك ويسعدك دايما

كل سنة وانتم طيبين بمناسبة رمضان اعاده الله عليكم باليمن والبركات وبلغنا اياه بطاعته بمناسبة رمضان والدعوة اللى عملتها البت

المشمشيه انا كتبت الكلام ده هو اه متاخر شويه بس معلش انا هقول بس ...انا مسامحه اى حد ظلمنى مسامحه اى حد جرحنى

ومسامحه اى حدزعلنى فى يوم وعايزة اى حد زعلان منى يسامحنى من قلبه واى حد ظلمته يسامحنى لانى بجد عمرى ما قصدت اذى

حد ابداً.....

عشان كده انا هاخد هدنة من كل حاجه هدنة مؤقته من التدوين ومن اللنت عشان اقدر انا كمان اسامح نفسى على اى اذى سببتهولها

لحد ما اصالحها وبعد كده هرجع ان شاء الله ....اكيد هرجع قبل العيد عشان اعيد معاكم اومال ايه ........

بس بجد اى حد ممكن اكون زعلته منى ولو للحظة يسامحنى بجد عشان اقدر اسامح نفسى واصالحها ....

اللى اللقاء احبتى

اختبار سريع

السلام عليكم ...

عارفه انى غبت كتير جدا ...وبجد وحشتونى جدا ,فى فترة الغياب دى طبعا كانت الامتحانات والنتيجه ظهرت والحمدلله مش عارفه هنروح فين بالمجموع ده بس ان شاء الله خير

فى الفترة دى عارفه انى مقصرة جدا فى حقكم ومش بزور حد ولا بسال على حد بس والله غصب عنى بس كنت بحاول اتبع بقدر الامكان وكنت بقرء معظم البوستات بتاعكم بس مكنتش بلحق اعلق , فى الوقت ده بقى ايه لاقيت جانى تاجين بس ماشاء الله كل تاج فيهم دسم اوى واسئلته حلوة اوى بس صعبه شويه بس حقيقى مش فاكرة مين اهدانى التاجين دول بس التاج الاول اهديتهولى جودى , و ايمان روحى والتاج التانى جالى من شيمو القمر حبيبتى اللى وحشانى جدااا جدااا ..............

نبدء بقى واول تاج

س/من انت وما الذى تفعله هنا؟

انا انسان ...ابحث عن كل شئ جميل فى الحياه

س/اسرائيل تقصف كل جنوب ممكن بحثا عنك ..فاى مكان ستقصد؟

ساقصد الله

س/انت مكلف بحذف حرف من حروف اللغه العربيه ..فايها ستختار ولماذا؟

هل يعقل حذف حرف من حروف القران ....لايمكن

س/لوقدر لك ان تدخل السجن فما هى القضيه التى تتمنى ان تدخل بها اليه؟

فى الدفاع عن الاسلام والمسلمين

س/منذ متى اكتشفت نفسك؟

جارى البحث لكن اعتقد انى بدءت اصل لاول الطريق بحمد الله

س/على مفترق الطريق لافتتان اليمنى تقول "الى حلمك" واليسرى تقول "الى مالم يحلم به البشر"...اى طريق ستسلك ؟

"الى حلمك" اقصى ما اتمنى الوصول الى حلمى لان مالم يحلم به البشر شئ مجهول

س/نحن لانعيش حياتنا بل نتعلم فيهاكيف نعيش...ماتعليقك؟

صحيح...الحياه كالمدرسه نتخرج منها بانتهاء الاجل وكل يوم نحن فى جديد وفى خبرات اجدد تعلمنا كيف نعيش الحياة

س/بجمله واحده فقط اكتب تعريفا لكل كلمة من الكلمات الاتيه...

الوطن...بوحشنى وانا فيه حتى ولو كان مليان عيوب

الام....نبض الحياة

الليل..هدوء وظلام يدخلنى عالم الاحزان ويخرجنى منه كذلك

الحب...مفتاح الحياة

امريكا..روموت كنترول بيتحكم فى العالم ,لكن لكل شئ نهاية

المرأة..نصف المجتمع..ومدرسة الاجيال

الصمت..كثيرا ما يكون ابلغ من الكلام ,اعتبره انا مفتاح صومعتى

الانترنت..عالم افتراضى ,وسلاح ذو حدين يتحم فيه فقط مستخدميه

الماسنجر..ملتقى احبابى واصدقائى

س/اختر منصبا واتخذ قراراً....

لو ينفع افضل انسانة حرة كما انا بلا قيود مسؤليه لا استطيع تحملها,وحين استقر فى منصبى هذا ساتخذ على نفسى قراراً بان اتقى الله دائما

س/قيس ,عنترة, وجميل ..هم الذين يقولون الشعر وليلى وعبله وعزة "صموت" فلما هذا التغيب للمرأة ؟

هل يعتبر حياء المرأة وصمتها استحياءً تغيب لها؟......بالعكس فقمة حضورها بحيائها ولا يعنى صمتها اطلاقا عجزها او تقصيرها

س/ان تكون مطلوبا لارتكابك جريمة,خيرا لك من الا تكون مطلوباً اطلاقاً...هل تتفق مع هذه العبارة؟علل.

انا بطبعى ابتعد عن كل ما يعرضنى للمشكلات...لذا لا يهمنى ان اكون مطلوبة مادام طلبى هذا سيجلب لى الاذى

س/الى اين تمضى كلمات الحب بعد ان نقولها؟

تصل دائما الى من هو مقصود بها ..قد تتاخر فى الوصول احيانا ولكن مادامت صادقه فلن تضل طريقها ابداااا

س/هل تجد علاقه بشكل او بأخر بين المرأة وبين قطاع الطرق؟

المرأة بطبيعتها رقيقه وقطاع الطرق على العكس تماماً, ولكن قد تكون هناك علاقه فالمرأة تسرق القلوب بخفه وسلاسة وقطاع الطرق يسرقون البشر

س/كيف هو غداً...؟

غدا هو فى علم الغيب, لكنى آمل ان يكون الغد افضل

لمن تمرر التاج؟

لا ثانكس مش عايزةحد يشوف المرارة دى وبعدين اكيد الكل جاوبه انا اللى اتاخرت فى حله ...بس لو ولا بد يعنى يبقى

لـ بسمة صلاح نصى الغالى

وزهرة الحب زهراء صاحبتى

و....الشيماء صلاح ....وكل اللى يحبه يتفضله

مش هجاوب التاج التانى انهارده وقت تانى بقى ان شاء الله

اسفه للإطالة

ياربى تعبت

السلام عليكم

وحشتونى جدا جدا جدا

وشكرا جدا لكل اللى سأل عنى وشكرا برضو للى مسألش

الحمد لله الامتحانات كويسة بس محتاجه دعائكم اوى ...انا جيت اطمن عليكم وافضفض شويه لانى عندى كبت هيقتلنى وضغط هيموتى وحزن هيدفنى بالحيا

يعنى مضطربه نفسيا ,وصحيا وجتماعيا وعاطفيا طبعا...... من ضغط الامتحانات ومن مشاكل تانيه خاصه بيا وكل ما اخلص من حاجه تجيلى حاجه انيل منها "يارب عفوك وسترك" وكل ده كوم واصحابى فى الثانوى كوم تانى خالص .... مش قادرة اتخيل ان بعد اسبوعين الله اعلم هشوفهم تانى ولا لاء ... ومن فيهم هتفضبل فكرانى ومن فيهم هتنسانى ....ومها انتيمتى هتبقى معايا ولا لاء كل ما بتخيل انها ممكن متكونش معايا فى نفس الكليه بتصدم اوى بقالنا 7 سنين اصحاب وتيجى الهبابه الثانوى تفرقنا ((يارب ماتحصلش ابدا))

بجد مخنوقه جدا ..... وهموت واعيط بس لما بعيط بتعب وبتنيل ومش هعرف اركز فى الانتقمات الزفت دى .... يلا هانت كلها اسبوعين وهخلص وافضى للعيط بقى وهعيط كتيييييييير <ههههههههه>

ومبروووووووووووووووووووووووك كبيرو اووووووووووووووى لدودى عاشقه الرومانسيه بجد بجد فرحتلها اوى

وتروحى وترجعى بالسلامة يا ليدى يا قمر ويارب النت يبقى تمام التمام فى عمان عشان متتاخريش علينا.....

_______________________

يارب عديها على خير .... هتوحشونى لحد مارجع انا بس جيت اطمن عليكم وافضفض فى مدونتى حبيبتى اللى وحشتنى موووووت

اللى اللقاء اصدقائى

إستفتــــــــــاء

وحشتونى كلكم اوووووى اوووووووووى

انا جيت اطمأن عليكم واطلب منكم طلب صغنن

انا عايزة اعرف أرائكم فيا بصدق وبصراحه تامة وبدون اى مجاملات لان بناءً عليه بعد امتحاناتى هتخذ قرار وانتم وحدكم اللى تقدروا تساعدونى فيه سواء بالإيجاب او بالسلب

س/ انتم شايفين ازاى ؟؟

س/ انتم شايفين مدونتى والكلام اللى فيها ده ايه؟ هيافات ولا اى كلام وخلاص ؟؟؟

س/ بتدعولى ولا لأأأأأ؟؟؟

بجد محتاجه لدعائكم انا مدمرة تماماً واعصابى باظة ونفسيا منهارة

محتاجه لدعائكم بجد

---------------------------

ياريت تجاوبونى على الاسئله دى بكل صراحه وصدق...........

ملاكى أنتِ

قبل اى كلام هجوعكم واوريكم تورتايه بالشوكالاته عشان انا بحب الشوكالاته وبعدين اقولكم ان التورتة دى لمامتى حبيبتى وانا كمان عشان انا اللى جيباهالها

كل سنة وانتى طيبه يا اغلى ماما والبوست دة مخصوص ليكى يا حبيبتى وياريت تقبلى منى الهديه البسيطة المعنويه دى لان حالتى ما تسمحش بهديه مادية وبعدين كفايه انا اجمل هديه فى حياتك

كل سنة وانتى طيبه يا حبيبتى

كل عام وانتى لى نبض الحيــــاه

كل عام وانتى نبع الحنـــــان...

كل عام وانتى لى دفئ وأمـــــان

كل عام وانتى امـــــــــــــــــــى

يا قلبا اعيش به الحيـــــــــــــاة

ويا عقلا اتغلب به على الصعاب

ويا أملا لى فى حاضرى وغدى

احبـــــــــك يا ملاكى الحانــى

ياروحا هبطت من السماء لتنير دربى

وحارسا ارسله الرحمن لتحفظى سرى

هدية انتى من المنـــــان.....

فأحفظ لى ملاكى يا ربـــــــــــى

بنـــتك وبسمـــتك

بســــمة

_______**______________**_______

ازيكم يا ناااااس طبعا عرفتو انا رجعت ليه بس انا راجعة تانى لصومعتى <<ادعــــــــــــــــــــــــــــــــولــــــــــــــــــــــــــيى>>

هااااانت والله هانت

السلام عليكم .....ازيكم يا اصحابى ....

انا جيت انهارده عشان اكتب اخر بوست ليا لحد ما اخلص امتحانات ...جدول الامتحانات نزل يا ناااااس امتحاناتى13/6 ادعولى يا بشر

المهم بقى انا داخله اوصيكم على المدونة وعلى البنآدمين والارواح اللى هسيبهالكم هنا دى امانه لحد ما ارجع وانا هحاول ابقى اطمن عليكم كده عشان انا عارفه متقدروش تتحرموا منى كتير

وخلوا بالكم من العيال اوعوا حد فيهم ينزل الشارع لحسن يخبطه توكتك ولا فرخه تعطس فى وشه والانفلونزا الطوير ولا الخنازير دى تطوله .....

بصوا من الاخر كده هتوحشونى بس وربنا اللى مش هيدعيلى لهيشوف منى معامله تنسيه نفسه بس هه.........وهخلى جاميكا واخواته يتلموا عليه ويدمدموووووه-ادعواااااااااااااا-

والمصروف انا سيباهلكم تحت المرتبه ابقوا خلوا بالكم منه اوعوا تصرفوا منه حاجه انا قولت اهو ابقى الاقيه ناقص.............

يلا بقى هتوحشونى وربنا يسهل واخلص بقى من الهبابه دى ويوم 6/7 ان شاء الله هرجعلكم بالحلو كله

ومش هاسيبكم تانى بقى إلا يوم النتيجه وبعدها بشويه عشان محدش يسالنى عليها .....

سلام يا بنآآآآآآآدمييييييييييين__ادعووووووووولى__

حكايتى معاه

على ...البندانه مزبوطه

ايوة قمر 14

صوتى كويس يا على

كروان يا بسوسبس

اوكى ...فاضل قد ايه ع التصوير

حالا يله استعدى

1....2....3.....اكشششن

احم احم

بسم الله الرحمن الرحيم

اعزائى المشاهدين والمستمعين انهارده هحكيلكم عن حكايا من حكاوى الزمن...حكايه هيا بشكل ما تخصنى انا شخصيا جدا

الحكايه يا احبابى عن عشرة عمر ,عن اغلى شئ عندى ....حضوره اسعدنى جدا بس نهايته كادت تدمرنى جدا

لما جانى فرحت بيه اوى وحبيته جدا وعملت المستحيل عشان ازبطه واجيبله لوازمه والذى منه ....فضلنا مع بعض حوالى سنتين ستوووب.......فيه ايه يا بوسبس بتعيطى ليه

خلاص خلاص اسفه يا جماعه ...منديل يا على بليز....يلا نكمل

اكششششششششن................فى السنتين دول جمعنا احلى الذكريات كان دايما معايا وكنت دايما مهتمة بيه جدا ....لو جراله حاجه بجرى عليه لأخصائى حالته واعلجه فورا.....بصراحه ,استحملنى كتير واستحمله غلاسته وتناكته كتير اوى .....بس غصب عنى حبيته وفجأةمن فترة كده ......

لقيته بيهنج كنت هتجنن بس والله مكنش ف ايدى حاجه اعملهاله وقدرت اتكيف معاه بعد الغباء اللى وصلت ليه حالته وبصراحه يعنى ومخبيش عليكم انا كنت بهبده ف الارض كتير بس وربنا غصب عنى يا حبيبى يعنى اعملك ايه اذا كنت انت مايص واعصابك سايبه ....المهم....مرة وقع على البلاط ومرة وقع ف الشارع ومرة وانا بركب الواصله وقع ومرة وانا فى المواصله وقع من الباب وكانت دى الضربه القاضيه لحبيبى الفقيد

بعد كل هذه الصدمات المتواليه بدأ يزداد هبلا واستعباطا فقد كتم صوت منبه الرسائل .....وبعدها بفترة اكتشفت ان كامرته مبتصورش ....والان ها هو ملقا يائس الحال يحتضر وينازع ((بس وربى ما انا معبراه...هو اللى هانت عليه العشرة يغور ف داهيه))........احم احم

حاولت معه كثيرة الا تتكركنى وحيده لن اتكيف للتعامل مع غيرك يا رفيقى ولكن لاحياه لمن تنادى وراااااح منى حبيبى رااااااااح تليفونى العزيز رااااح يا ناس راااح

لمده شهرين مش هسمع اغنيه حلوة فى المكروباص ....لمده شهرين مش هتصور صورة حلوة مع صحباتى.....لمده شهرين مش هبعت مسج لأصحابى .....لمد شهرين مش هقول آلووووو واحمد حلمى هيزعل منى

آآآآاه يا انى آآآه

بإختصار شديد يا اعزائى المشاهدين والمستمعين ......موبايلى الحبيب بااااز وبالغالى اشتريته بالرخيص باعنيه

ويؤسفنى ان اودعكم لان وقت برنامجنا انتهى للاسف .....وبإذن الله لنا لقاء اخر فى حلقه قادمة ان شاء الله لأخبركم عن تليفونى الجديد.......يلا جود باااااى

كل اللى يوصل لاخر البوست الحزين دة يقولى ايه رأيه فيا كمذيعه ناجحه

تشااااووو